Yangon hrambunh All Chin Society hruainak in Chin Tlangholh kan ngeih khawh nakhnga tiin Chin Multi-dialectical Dictionary chuah an i tim, tiah tuanvo ngeitu sin in kan theih.
“Tlangholh ngeih ti mi hi a har tuk mi a si. Cun, tutan ah dictionary kan chuah lai kan ti mi zong tling khitkhet in kan tuah kho rih lai lo. Kan holh tawi tete aa khat cio mi kha thim in kan fonh lai. Tahchunhnak ah Tedim le Tonzang hi an holh aa naih, Mindat le Kanpetlet, Hakha, Thantlang le Falam, tibantuk in kan holh aalo mi tete kha kan khawmh lai i kan fonh lai. Cu aa khat mi holh a khawmtu ding minung zong thim an si. Pu Stephen Ni Kio nih a kan hruai lai i a cauk cu zeitik ah dah kan chuah lai ti belte a fiang kho rih lo i zeitin kan phawtzamh lai ti zong a fiang kho rih lo,” tiah All Chin Society Chairman Rev. Peter Ngun Za Cung nih The Hakha Post ah a chim.
Hi Tlangholh Tawlreltu ding ah thim mi hna cu; Pu Stephen Ni Kio (Convener 1), Bishop Dr. A Mang Lone (Convener 2), Pu Ro Sang (Secretary), Pu Ro Khar Thang (Joint Secretary) le Pu Thang Yo (Treasurer) an si.###
