October 4, 2023
Mizoram Palek nih nizan October 3, Lengpui Airport, Aizawl ah Myanmar rammi nu pakhat cu rithaisii Methamphetamine (Crystal meth) tampi he an tlaih tiah Mizoram Palek sin in theih a si.
Rithaisii he an tlaih mi cu Lalremthangi, kum 38 a si i, Delhi ah phorh a timh mi suitcase chung ah Methamphetamine 10.4 Kg hi hmuh le tlaih a si. Lalremthangi cu Myanmar rammi a si i Delhi khuapi ah a um mi Spa pakhat ah rian a tuan mi a si. Kan hnu nai te ah khan Myanmar ram chung ah a va lut i, a kir lei ah rithaisii hi a rak phorh mi a si tiah Mizoram Police thawngthanh ah an langhter.
Lalremthangi sin ah palek nih an tlaih mi rithaisii cu atu lio thil man cun India tangka nuai 310 hrawng man a si tiah an tial.
Rithaisii he tlaih mi Lalremthangi cu upadi ning in hremnak pek awk ah taza an cuai colh tiah theih a si.
Photo: Mizoram Police
