2019 February 2 in AA nih tlaih mi Paletwa Peng Kin Ta Lin khuami 54 chung ah minung 12 cu an zaam i July 1 ah an khua an phan cang nain a luat mi he a taang rih mi ca he lungrethei cu a si rih ko, tiah Minister Pu Soe Htet nih a chim.
“An zaam khawh mi hi kan i lawm tuk. Amah belte, AA nih hin Chinmi hi an kan nehsawh tuk i an duh tik caan poh ah harnak pek than khawh thiamthiam a si tik ah hna a ngam kho taktak lo. A ngaingai cu Chin miphun cu kanmah kan khuasaknak khua in thial a duh mi kan si bal lo. Khuaram a tlaihchan mi kan si i atu zong anmah khuate ah an kir than hi a si. Cozah leikap zong nih a si khawh chung in zuanhnawh kan duh ko hna nain hriamtlai an si tik ah kan duhning in rian kan tuanpiak kho hna lo. Lungrethei ngaingai a si rih ko,” tiah Chin Ramkulh Cozah Chimphuannak Nawlngeitu Sipin Minister Pu Soe Htet nih The Hakha Post ah a chim.
AA nih an tlaih hna lio ah Kin Ta Lin khua ah an luut i ‘Cozah ralkap nih bomb puah an timh ca ah kanmah sin ah ra u’ tiin an kalpi hna. An konglam thei kho loin thla 5 chung Bangladesh ramri ah an chiah hna. An kalpi hna lio ah minung pahnih cu an zaam. Pakhat cu a thluak a hmaan thai lo ca ah nihin tiang thonginn ah chiah a si. Atu hi a voi hnihnak minung 12 an zaam a si.
“A zaam mi 12 chung ah pa 3, nu 3 le ngakchia 6 kan si. Ruahpi suur lak ah zaan thum kan riak. Ti lo rawl loin kan si. Kan hawile dang zong zaam ding ah kawh le auh kan duh tuk hna nain kan umnak aa hlat deuh i kan au ngam hna lo. AA hriamtlai pawl an umlokar kan i seel i kan hung zaam. AA sakhaan kan um lio ah rianhraang an kan tuanter. Lo an kan thlawhter i kum 64 a si mi ka nu hoi cu AA sakhaan ah a kan thihtaak,” tiah Daw Hwuit Than nih BBC ah a chim.
AA tlaih mi Paletwa khuami hi an dihlak ah 54 an si. Pa 2 cu lampi ah an zaam, pakhat a thi i, 12 an zaam than. Atu hi AA sakhaan ah minung 39 an taang rih.###
