Arakan Army (AA) nih Believers Church Myanmar Pastor Tun Nuu cu January 19 ah an tlaih, an kalpi i nihin tiang a kir lo, tiah tuanvo ngeitu sin in kan theih.
Pastor Tun Nuu hi Kyauktaw Peng Tanchaung khua ah pastor a tuan mi a si. Nupi fate a ngei mi a si. AA ralkap minung panga nih, “Kan bawipa nih biahal ding an ngei,” tiah an kalpi i January 25 tiang ah a kir rih lo, tiah kan theih.
“Amah hi an khua hrawng ah an bochan ngaingai mi a si. An khua hi a thangcho tuk mi a si ve lo tik ah a zeipoh ah amah hi an hman mi a si. Ruahnak a chuahpi kho i thil pakhatkhat a can zong ah tawlreltu ah an sawm peng mi a si tik ah AA an bawile zong nih amah theng an auh i biahal kan duh a tinak hi a si lai. Nihin tiang cu a kir lo ca ah Khrihfabu zong nih thla kan campiak cuahmah,” tiah BCM General Secretary Pastor Thawng Tha Thang nih The Hakha Post ah a chim.
Pastor Tun Nuu cu inn 12, member 55 an pastor a si. Fa pathum a ngei. AA ralkap nih a kong hngalh loin an kalpi i nihin tiang a kir rih lo, tiah kan theih.
