CDF hriamtlai cheukhat sawmnak in Kanpetlet peng chung ah AA ralkap pawl rak luh ding in an sawm hna caah Kanpetlet Circle (5) tualchungmi hna nih duhlonak ca an chuah, tiah theih a si.
Raldoh bawmh ding in an sawm mi AA ralkap pawl cu Kanpetlet Circle (5) hmunram chung ah umkal kan onh hna lai lo, tiah ca an chuah mi ah an langhter.
Hmailei ah tlangcungmi pakhat le pakhat karlak buaibainak a chuah nakhnga lo, Chin miphun pakhat le pakhat karlak buaibainak a chuah nakhnga lo le hriamtlai bu pakhat le pakhat karlak ah buaibainak a chuah nakhnga lo, AA hriamtlai a sawmtu hna nih ṭuanvo nan laak hrimhrim a herh lai, tiah an langhter chih.
AA hriamtlai pawl cu Thlanglei Laitlang chung i CDF hriamtlai cheukhat sawmnak in Mindat peng le Kanpetlet peng ah an phan cang ti mi thawngpang zong a leng ngai nain The Hakha Post nih cun dikthlir in fehternak kan tuah kho rih lo.
