AA le Myanmar ralkap kahdohnak ruang hin rian kan tuannak lei ah kan duh ning in tuan kho lo in a kan nuarh ter ngai tiah CM Salai Lian Luai sin in July 21 ah kan theih.
Chin Ramkulh Chief Minisiter Salai Lian Luai nih, “ AA le Myanmar ram kahdohnak ruang ah hin rian kan tuannak ah a kan nuarh ter ngai. A bik in Paletwa lei Kaladan simanking ah India ram le Myanmar ram i hawikomhnak hlei tuah ding a um. Sittwe in Paletwa ah tan 300 a phor kho mi tilawng pawl kal khawh dingin tiva an kan kauhter i tilawng dinhnak Paletwa ah kan tuah. Hi tilawng kalnak kan tuah mi hi cu kan lim dih cang. Atu ah Sittwe in Paletwa khua hi tilawng tan 300 a phor kho mi tilawng duhchung in a kal kho cang. Kaladan tiva hlei ah Japan design bantukin kan tuah mi zong kan dih dih cang hna. Paletwa in Zolianpui ti mi India ram ah Motor lam kap hnih kalnak kan tuah. Hi Motor lam kan tuah mi zong hi nikum ah dih ding kan si cang nain AA le Cozah ralkap kahdohnak ruang ah kan rian zong kan tuah kho ti lo. Kan duhtluk in kan tuan kho lo i a poi ngai. Atu hnu zong ah lim khawh kan i zuam rih lai,” tiah The Hakha Post ah a chim.
“Hi kan rian hi dih kho dih usihlaw vawlei cung ram dihlak Tuluk, Japan, Singapore ram le vawleicung ram dihlak zong nih tilawng in duhchung thilri a phan kho cang lai. Thilri pawl zong Sittwe ah an thlak lai i tilawng a fa mi in Paletwa ah, Paletwa in Mizoram, Mizoram in India ram dihlak ah kan kuat khawh dih hna lai. India ram thilri zong ah Myanmar ram ah kuat khawh dih kan duh. Laitlang dihlak i thil a chuak mi tawlreba, rua, thingkung le thingthei a chuak mi pohpoh zalong tein vawlei cung dihlak ah kan kuat khawh dih cang lai. Hi rian pawl hi kanmah nih kan tlaih chung ah lim kan duh. Mizapi an chawkawlnak zong ah tamtuk bawmtu thil a si lai ca ah laimi dihlak nih rian tam pi kan tuan a hau,” tiah Chin Ramkulh Chief Minisiter nih a chimchap.
Rian kan tuan hau kan ti tik ah Myanmar ram he investment tuah ding in India ram Cozah he biahren kan tuah cang. Kan simanking hi kan lim ahcun India thilri zong Tuluk ah kan kuat khawh. Myanmar ram dihlak ah kan kuat khawh dih cang hna lai tiah CM Salai Lian Luai nih a chimchih.
