Yangon um Chinmi nih Chinram in AA an chuah ding lam an zawh mi kong ah AA Chimphuannak Nawlngeitu Khaing Thukha bia, Chin Ramkulh Ramri lei Runvennak Minister Colonel Han Win Aung nih July 15 ah lehnak a tuah.
AA hriamtlai Chimphuannak Nawlngeitu Khaing Thukha nih a chim mi cu, “Chinram in AA chuak hna seh, an kan ti mi hi a ngaingai cu Cozah ralkap an chuahter hmasa hna awk a si,” tiah Yangon um Chinmi nih lam an zawh mi kong he pehtlai in RFA nih a hal mi ah a chim mi a si.
“Kannih cu Cozah ralkap kan si. AA nih Cozah ralkap chuak hmasa hna seh, ti cu zeihmanh sullam a ngei lo mi a si. Paletwa cu Chinram a si. Rakhine ram a si lo. AA nih duhpoh in an um nakding hmun zong a si lo. An duhduh in khua an sa, an lor, harnak an kan pek, tlaihkhih, mei duah, tibantuk in a phunphun harnak an kan pek ruang ah Cozah ralkap nih runvennak le himnak kan tuah mi tu a si. Kanmah chuah a hau lo. Anmah AA chuak hna sehlaw Cozah ralkap aa thlak nakding a um lo,” tiah Chin Ramkulh Cozah Ramri lei Runvennak Minister Colonel Han Win Aung nih The Hakha Post ah a chim.
AA hriamtlai hi Chinram Paletwa ah kum 5 dengmang hmunhma an khuar cang i khuami tampi harnak an pek hna ruang ah Yangon um Chinmi nih July 13 ah Chinram in AA an chuah ding lam an zawh, tiah kan theih.
