Chinmi hna nih Rakhine hriamtlai AA hi ral ah i ser loin hawikom tu ah kan i ser hna awk a si, tiah US ram ah a phanmi Mizoram Chief Misniter Pu Lalduhoma nih a chim.
September 4 ah Indianapolis khua i Chin Evangelical Baptist Church (CEBC) ah Pu Lalduhoma le Chin mipi tonnak an ngei i cu lio ahcun atu bantuk hin a chim hi a si.
AA hi kanmah nakin thazaang a ṭhawng deuhmi an si caah anmah he i doh si loin i rualrem le hawikom ah ser ding an si. CNF siseh, Chin Brotherhood siseh, Chinland Council le ZRA zong si hna seh, AA le PDF he kan dohmi aa khah ko i kan karlak ah buaibainak a chuah ahcun SAC tu aa lawm lai. Cucaah, AA hi hawikom ah kan ser awk a si. Cuti a si lo ahcun Lawngtlai tiang ra in AA nih hnahnawhnak a kan pek lai, tiah Pu Lalduhoma nih a chim.
US ram ah a tlawngmi Pu Lalduhoma cu September 2 ah khan Mizo Day ah khuallian dirhmun in caan a hmang i, September 4 ah Chin miphun tampi khua an saknak ah a rak tlawn hi a si.
Chin miphun hna he ton biaruahnak ah Chin miphun dothlengtu bu hna karlak, biaknak lei bu hna karlak le zatlang bu hna karlak ah ṭhawngṭha ngaiin rianṭuan ṭi khawh a si nakhnga biapi in Pu Lalduhoma nih a chim, tiah theih a si.
