Rakhine hriamtlai AA doh ding in Rohingya hriamtlai phu 4 nih Four Brothers Alliance (All Rohingya Army) ti mi an dirh tiah theih a si.
Ramkhine ramkulh chung ah a cawlcang mi Rohingya Solidarity Organisation (RSO), Arakan Rohingya Salvation Army (ARSA), Arakan Rohingya Army (ARA) le Rohingya Islami Mahaaz (Arakan) an i fon i AA kan doh lai tiah thawng an thanh.
AA nih SAC ralkap sin in an laak mi Buthidaung le Maungdaw laak ding in Four Brothers Alliance (All Rohingya Army) hi kan dirh mi a si tiah an langhter.
“Muslim Baibal Koran cawnpiaknak ning in ahmaan mi lei ah kan dir lai i, a kan namnehtu pawl kan doh hna lai. Kan ram ṭha tein kan kilven lai,” tiah theihteihnak an tuah.
Kan ram tiah Rohingya hriamtlai nih an ti mi hi Buthidaung, Maungdaw le Rathedaung hi an si, tiah Rakhine thawngzamhnak Western News nih a langhter.
“Na inn le na lo nangmah nih na kilven a herh. Na ram zong nangmah nih na kilven a herh. Cuti na tuah ahcun hringtu na nu le na pa an i lawm lai i na chungkhar zong an i lawm lai,” tiah Four Brothers Alliance (All Rohingya Army) nih Rohingya mipi an forhfial hna.
