Matupi peng ah AA nih an kamh mi bomb rap nih CDM a tuah mi sianginn cachimtu tel in tualchungmi pathum a puah hnawh hna caah hliamhma an pu, tiah theih a si.
July 6 zinglei ah khan Matupi peng Kola khua ah thilri laak ding in a kal mi CDM cachimtu Saya Khawng Bawi cu lampi ah AA bomb rap aa lamh sual caah a ban le a ke ah hliamhma a pu.
Walang khuami Pa Tui Moe le Kola khuami Pa Lawng Man zong AA kamh mi bomb rap nih a puah hnawh hna caah an ke ah hliamhma an pu ve, tiah Matupi Times nih a langhter.
Bomb rap nih a puah hnawh hnanak hmunhma hi Matupi-Paletwa lam cung ah a si i, naite ah khan hika hrawnghrang ah hin AA/CB le Chinland Council karlak ah i kahdohnak zong a rak um.
CDF-Matupi Brigade (2) chimnak nawlngei Naing John nih hika hrawnghrang ah hin AA nih bomb rap an tarh hna, tiah a chim.
