Rakhine hriamtlai AA i bochan in CDF-Matupi Brigade (1) nih Brigade (2) hmunram ah ral lam sialnak an tuah caah Brigade (2) nih October 31 ah ralrin peknak ca a chuah.
Hmunram ngeitu hnatlaknak tel lo in ahohmanh nih ral lam sial lo ding le sakhaan sak lo ding in CDF-Matupi Brigade (1) le Brigade (2) karlak ah hnatlaknak an rak ngei nain cu hnatlaknak cu CDF-Matupi Brigade (1) nih a zul lo, tiah Brigade (2) nih a langhter.
Chin Brotherhood chungtel Brigade (1) nih AA thazaang i bochan in Brigade (2) Vokok Battalion hmunram ah ral lam an sial lawng si loin sakhaan zong an tuah caah Brigade (2) nih duhlonak faak piin a langhter.
Cacawnnak sianginn le biakinn pawl ah AA le CDF-Matupi Brigade (1) nih hmunhma an khuar lawng si loin tualchungmi hna tlerhkhawnhnak, tlaihkhihnak le umkal phihkhamnak zong an tuah, tiah CDF-Matupi Brigade (2) nih a langhter.
Atu bantuk in AA bochan CDF-Matupi Brigade (1) nih a tuahmi thilṭha lo pawl hi a ngol zokzok lo a si ahcun a hnuzul buaibainak kong ah ṭuanvo an laak dih lai, tiah Chinland Council chungtel CDF-Matupi Brigade (2) nih ralrin peknak a tuah.
