Mizoram Cheif Minister Pu Lalduhoma nih US Chinmi he tonnak hmun ah a langhtermi “Kanmah nakin a ṭhawng deuhmi AA cu hawi ah i ser ding” timi ruahnak cu CNF nih a pom lo, tiah The Print thawngzamhnak nih nihin September 10 ah a ṭial.
September 4 ah Indianapolis khua i Chin Evangelical Baptist Church (CEBC) ah Pu Lalduhoma le Chin mipi tonnak an ngei i, Pu Lalduhoma nih, “AA hi kanmah nakin thazaang a ṭhawng deuhmi an si caah anmah he i doh si loin i rualrem le hawikom ah ser ding an si,” tiah a chim.
Pu Lalduhoma nih a chimmi kong he pehtlai in CNF Vice President Dr. Sui Khar nih, “Tlangcungmi hriamtlai bu asiloah Mizoram cozah i duhthimnak hi AA ṭhawnnak nih lai a rel awk a si lo. Thil dik le dik lo cu mahle khaap cio in tah a si; thazaang in tah a si lo,” tiah a chim.
‘Kanmah nakin a ṭhawng deuhmi hna cu kan miphun le kan ram a nanmehtu an si zong ah hawi ah kan ser hna awk a si’ timi sullam keng phun in Pu Lalduhoma nih US a tlawn lio ah a chim caah CNF lawng si loin Chinmi tampi nih an lungtlin lonak an langhter cio.
