A voi 70nak Chin Miphun Ni ah Hakhathar in minung pakhat khuangcawi ding mi cu Hakhathar dihlak lungtlinnak in Naahau tlang Mai Run Sung khuangcawi a si lai, tiah kan theih.
Mai Run Sung hi Chin Ramkulh Uknak Zung ah LD rian a tuan lio mi a si i Pu Ni Khuai le Pi Hoi Vaang hna i an fanu a si. Amah hi Unau chuakti panga chung ah a hniang bik a si.
“Khuangcawi ding mi ka si tik ah hin kan chungkhar khuasak ning le ka sining nih zei hmanh a tlinh lo. Pathian dawtnak thawng lawng in a si ko,” tiah khuangcawi ding mi Mai Run Sung nih The Hakha Post ah a chim.
A voi 70nak Chin Miphun Ni khuangcawi ding mi hi February 5 zaan Hakhathar Sang pahnih a si mi Naahau tlang le Lungphun tlang nih ceihmai hnu ah lungtlin in thim mi a si.
“Kannih Hakhathar cu aa thialka kan si tik ah kan harsa ngai hna, cucu zapi nih nan kan theih mi khi a si ko. Cozah lei in budget pek mi a um ko zong ah chungkhar lei in dihheu mi a tam tuk ve i Cozah nih a ruah ngaingai zong a herh mi a si. Khuangcawi nakding laam le hla zong kan cawng chom lai, hi ca ah Khuahlun lei zong bawmh kan hal hna,” tiah Hakhathar khuabawi Pu Tawk Lian nih The Hakha Post ah a chim.
2017 kum a voi 69nak Chin Miphun Ni ah Hakha Khuathar in Mai Biak Tha Cuai khuangcawi a rak si i tutan a voi 70nak cu Hakhathar in Mai Run Sung a si lai.
The Hakha Post
