A voi 4nak Myanmar Baptist Convention chungtel Bible Sianginn dihlak fonh pumhpi an tuah lio
===================================================================
A voi 4nak Myanmar Baptist Convention (MBC) chungtel Bible Sianginn dihlak fonh pumhpi (The Fourth Conference of Myanmar Baptist Theological Schools) cu Hakha, CCU ah November 28 in an thawk i December 2 tiang a si lai.
Hi pumhpi ah khualtlung a phan mi hi khualtlung tawlreltu hna cazin laak ning ah minung 536 an si. November 28 ah pumhpi honnak tuah a si i cu hmun ah Chin Ramkulh Chief Minister le Minister dang hna, CACC GS, HBA GS le a dangdang upa pawl an i tel kho. Tutan ah khuallian dirhmun in MBC GS Rev. Dr. Thang Cin Lian nih a telpi hna, tiah kan theih.
“MBC chungtel Bible Sianginn hi sianginn 52 kan si. Cu chung ah tutan a voi 4nak pumhpi ah sianginn 46 in an ra kho. Chun ah kan tlangtaar a si mi ‘Khrih ah a fek mi sinak’ ti mi kha cathluan chuahpi in ceihmainak ngeih a si i zaan ah pumhnak in caan hman a si. Hi cathluan chuahpi mi ceihmaipitu minung zong thim an si,” tiah Rev. Dr. Luke Sui Kung Ling nih The Hakha Post ah a chim.
Tutan pumhpi khualtlung poh cu group then in December 2 Zarhpini zing pumh cu Biakinn kip ah caan an hmang lai i a dih in Hakha khuachung kal an duhnak le zoh an duhnak ah motor in an i chawk lai, tiah kan theih.
Zaan pumh caan ah khua kip in a ra mi khual nih anmah le an nunphung he aa pehtlai mi laam ti bantuk in caanhmannak an ngei.
Myanmar Baptist Convention (MBC) chungtel Bible Sianginn dihlak fonh pumhpi hi kum thum ah voi khat tuah mi a si i a voi 5nak cu Asho Chin Theological Seminary, Pyay ah tuah a si lai, tiah kan theih.
The Hakha Post
