A voi 44nak Believers Church General Assembly Hakhathar ah an tuah lai

A voi 44nak Believers Church General Assembly Pumhpi cu March 23 in 25 tiang Hakhathar ah tuah a si lai.
Hi hmun ah Believers Church Myanmar, National Bishop le GFA FC a ngeitu Bishop Dr. CK No Chhum le ramleng lei in Pathian nih mizaw damter khawhnak a pek mi minung zong an phan ve lai, tiah thawng kan theih.
“Hi hmun ah Pathian thawngtha ngaih a duh mi, Pathian thangthat a duh mi le Pathian biak a duh mi poh zalong tein tel khawh a si. Pathian mi hman hlasakthiam tampi zong sawmchiah an si hlei ah ramleng lei in Pathian nih mizaw damter khawhnak a pek mi minung zong an i tel ve lai i taksa damlonak a ngei mi zong nih zumhnak he rak i tel cio khawh a si,” tiah Believers Church, Hakhathar Pastor Sui Thawng nih The Hakha Post ah a chim.
A voi 44nak Believers Church General Assembly pumhpi ah thawngtha chimtu ding hna cu; Bishop Dr. CK No Chhum, Rev. NC Thawng Tha Thang, Rev. Roger King (Ramleng), Apostle David Kenny (Ramleng) le Apostle Stacey Carver (Ramleng) hna an si.
Hlasatu ding hna cu; PBK Liankhuma, Daisy Lalbiaknungi, Sarah Van Tin Hnem, Thelma Lalhmingthangi le Sui Hlawn Rem hna an si lai, tiah thawng kan theih.