A ralai mi March 20 ah a voi 30nak Chin Revolution Day camtuak cu CNF/CNA Camp Victoria ah an tuah lai, tiah tuanvo ngeitu sin in March 13 ah thawng kan theih.
“Tutan hi ramleng in khuallian ngaingai cu kan sawm hna lo. Ramchung in Chin party hna, CYO, Biaknaklei upa hna, mino tampi le hlasakthiam tibantuk sawm in kan tuah lai. Cun, Chin Ramkulh mah Pengtlang cio in ai-awhtu upa tampi zong kan sawm hna. Lai laam hmuhsaknak le hlasaknak tibantuk zong kan tuah lai. Hlasakthiam Thawngbawi seh thilri (TnC Studio instrument) zong hlan a si cang,” tiah CNA Col. Solomon Thang Ding nih The Hakha Post ah a chim.
“Chin miphun nih ram kan kheelnak hi kum 30 camtuak zong kan phan ve cang lai. Hihi kanmah hriamtlaitu hna ramkheelnak lawng a si lo. Chin unau le nulepa kan dihlak nih democracy le federal kan kheel mi kum 30 a tlinnak ni a si ca ah mizapi cung ah kan i lawm i, kan dirpi rih u, ti zong nawl ka duh hna,” tiah Pu Solomon nih a chimchap.
