A voi 16nak Chin Ramkulh Hluttaw Caanhman Meeting an tuah
===========================================
A voi 16nak Chin Ramkulh Hluttaw Caanhman Meeting a ni khatnak cu Chin Ramkulh Cozah Zung, November 29 ah an tuah i biahalnak 20 hrawng le biatung 3 Hluttaw Palai hna nih an chuahpi.
Tutan Hluttaw Meeting ah ni zaan nai Myanmar ram caankar thimnak ah Matupi Peng in teinak a hmu mi Palai Aung Thang cu Chin Ramkulh Hluttaw Palai ah fehternak, rian peknak le chiatserh biakhamternak an tuah.
“Meeting a kai mi Hluttaw Palai pawl nih biahalnak 20 hrawng kan tuah i anmah le meekuanghmun he aa pehtlai deuh mi an si. Keimah zong nih, Tlangrua in Hripi tiang motor lam, Hmawngtlang High School pek ding ti bantuk in biahalnak pasarih ka tuah ve,” tiah Thantlang Peng Hluttaw Palai Dr. Hmuh Thang nih The Hakha Post ah a chim.
November 30 (Nihin) ah a nihnihnak Hluttaw Meeting tuah a si lai i Hluttaw Palai pawl sin in biatung a si ah, biahalnak a si ah an chuahpi rih lai, tiah Hluttaw Palai nih an zumh.
“Hnaring in Ruava kar motor lam cawh ding ka hal mi cung ah Chin Ramkulh Runvennak Minister nih hihi cu a biapi mi a si ca ah tuahcolh kan zuam lai, tiah a ka leh i lunglawmh awk ngaingai a si. A dangdang biahalnak an tuah mi pawl zong 2019-2020 tangka kum ah kan tuah lai, tiin bialehnak an tuah ve hna,” tiah Dr. Hmuh Thang nih a chimchap.
Tutan meeting ah biatung chuahpi mi cu; Chinram ah mino a sualhraang tuk mi pawl hi zeitin dah kan tawlrel hna ningcang a si lai, lam lung phah mi, thir hlei dawnh mi ti bantuk a fek le fek lo hneksaknak seh chiahpiak ding le taanghra awng general worker a tuan lio mi pawl ca ah siangniamruun cachimtu tuan khawh nakding tuaktanpiaknak hna an si. (The Hakha Post)