2020 April 27 (Cawnnikhat ni) thok in Hakha khuachung ah a ruang le konglam um loin a vaak sawhsawh mi thongthlak ding kong Minister Pu Sui Thio nih April 25, zaan 7:30PM The Hakha Post in fianternak a tuah than.
“Hihi khualak ah a vaak mi pohpoh tinak a si lo. Dawr zong an hon ko lai. Thil caw mi zong an um ko lai. Asinain, tlaih in thongthlak ding kan ti mi hi, phung a buar mi kha chim duh mi a si. Tahchunhnak ah ngandamnak he aa pehtlai mi sii-inn kal, siikhaan kal, sii cawk le Chiatni kong ah kal lo awk tha lo, tibantuk kha chim duh mi a si lo. Phundang cun, a vaak mi pohpoh thong kan thlak hna lai, tinak a si lo. Asinain, hmurhuh aa huh lo mi, a ruang le a konglam um bak loin a vaak mi kha kan tlaih hna lai. A neemnak in kan kirter hmasa rih hna lai. Kan caan a chia tuk hih. Va kir, kan ti hna lai. Nain, a kir duh lo mi, khuazeimaw in a um mi, a zaam mi, nawl ngai lo mi, nanmah luklak heiti phun in a um mi cu kan tlaih bak hna lai, kan tlaih taktak hna lai. A herh ahcun Biaceih Zung nih tangka liamter in maw, thongthlak in maw dan a tat ko hna lai. A ngaingai cu tlaih in thongthlak kha kan duh mi a si lo. Pumpak, chungkhar le kan khuaram a him nakhnga kan timhtuah mi a si. Nawl ngaih hi a tha bik ko. Inn chungte ah um a tha bik ko. Asinain, nawl a ngai ve lo mi hrat cu ahoho ti a um lai lo. Tlaih thluahmah an si ko lai,” tiah Chin Ramkulh Cozah Lamsuul le Pehtlaihnak Minister Pu Sui Thio nih The Hakha Post ah a chim.
Hiti Chin Ramkulh Cozah nih chawhvah kong a renghtlaih mi hi April 23 ah meeting biachahnak an tuah than mi a si. A zeitipoh in tlaih si loin phungphai a buar mi, a vaak sawhsawh mi hna kha tlaih in thongthlak bak ding tiin, nawl a chuah mi kha atu bantuk in a cunglei Minister nih a fianter than hi a si.
