SAC nih Falam peng chung ah hriampi le vanlawng in kahdohnak a tuah i tualchungmi thihlohnak tiang a chuah caah a let hnih in lehrualnak kan tuah cang lai, tiah CNO/CNDF nih mizapi sin ah theihternak a tuah.
CNO/CNDF nih mipi inn le lo rawhral lai phan ruang ah le mipi zawnruah ruang ah atu tiang kahdohnak kan tuah rih lonak a si, tiah Salai Timmy nih a chim.
“Kannih CNO/CNDF cu mipi rian ding le mipi kilkawi ding in hriam a tlaimi kan si bantuk in kan Jerusalem a simi Falam zong ah siseh, mipi zawnruah tuk le mipi inn le lo rawl lai phan ruang ah nihin ni tiang ah ral lei in action kan la tuk rih lo,” tiah a chim.
Asinain, nihin thawk in chun CNO/CNDF nih lehrualnak a tuah cang lai caah mizapi zong fimkhur te in um ding in a chim chap.
“SAC ralkap nih ningcang loin mipi uknak a laak lawng si loin hriampi in le vanlawng in mipi innlo a kah caah mipi nunnak tampi a liam timi ka theih tik ah CNO/CNDF nih kan in tuarpi ngaingai hna. Cucaah, CNO/CNDF nih cun nihin ni thawk in mipi nunnak a latu hi kan zoh sawhsawh ti lai lo i, action kan laak cang lai. Hriampi in voi khat a kan kah a si ahcun a let hnih in kan lehrul hna lai,” tiah a chim.
SAC nih October 7 le 9 ah Falam peng chung khuate pathum ah hriampi le vanlawng in kahdohnak a tuah caah tualchungmi pahnih an nunnak a liam lawng si loin innlo cheukhat an rawhral pin ah hliamhma a pumi tualchungmi zong an um, tiah kan theih.
