Korea hrambunh World Unreached People Mission (WUPM) nih a kum 10 tlinnak conference ah Myanmar ram in Bishop Dr. CK No Chhum le Pu Henry Van Thio nupi Dr. Anna Sui Hluan an sawm hna, tiah April 11 ah kan theih.
“WUPM hi Korea ram ah Khrihfabu 100 renglo fonh in tuah mi bu pakhat a si. A kum 10 tlinnak ah kanmah Myanmar ramchung in Believers Church Myanmar in Founder Bishop Dr. CK No Chhum le Vice President Pu Henry Van Thio nupi Dr. Anna Sui Hluan cu thawngthachimtu ding ah an sawm hna i hihi lunglawmh awk ngaingai a si,” tiah Believers Church General Secretary Rev. Thawng Tha Thang nih The Hakha Post ah a chim.
Hi conference cu April 20 in 22 tiang an tuah lai. WUPM hi vawlei cung ram tampi ah mission rian a tuan mi an si i Myanmar ramchung lawng hmanh ah biakinn 100 renglo an sak cang, tiah kan theih.
