Kalaymyo Peng in Chin National League for Democracy (CNLD) party chung in thimnak ah aa zuam ding palai pahnih cu fehter an si cang. Minung pathum cu an thim rih hna lo tiah July 6 ah kan theih.
Palai ding ah fehter mi hna cu; (1) Sagaing Hluttaw No.1 ah, Pu Chan Bik Lian. (2) Pyithu Hluttaw ah, Pu No Tawk Kap hi fehter an si. “Kalaymyo Peng ah hin thutdan 5 a um mi chungah pahnih cu kan fehter cang. Chin Affairs Minister thutdan pakhat a um mi ah, minung pathum nih min an pek i kan thim rih hna lo. A rauh hlan ah kan thim khawh ko hna lai. Amyotha Hluttaw le Sagaing Ramthen Hluttaw Kalaymyo No (1) chaklei aa zuam ding belte hi min a pe mi an um rih lo,“tiin Kalay Peng CNLD President Pu Lian Nawn nih The Hakha Post ah a chim.
Kalaymyo Peng CNLD party nih hin Kalay Peng in thutdan 3 aa duh rih mi hi ngeih khawh zau an i ruahchan. Miphun party tiin min pe mi an um ahcun a rauhhlan ah thutdan dihlak hi fehter khawh an i zuam tiah kan theih.
