United Democratic Party (UDP) nih 2020 kum thimnak ah meehmun kip ah kan i cuh lai i teinak kan hmuh hrimhrim lai, tiah Hakha Peng UDP tuanvo ngeitu hna nih June 24 ah an chim.
UDP Chairman Pu Ngun Tling nih, “Kannih party hi Hakha hoi ahcun, thla khat deng lawng kan cawlcanghnak a si rih. A ngaingai cu 2019 September thla khan rak dirh a si cang nain tuanvo ngeitu hna nih felfai in an rak tawlrel lo ca ah mizapi zong nih kan party hi an kan hngal tuk lo. USDP party hna ah an kan rel i pehtlaihnak a ngei mi hna ah an kan ruah. Asinain, Falam le Tedim hrawng ah cun an rak thawng ngaingai cang. Tahchunhnak ah Tedim hoi hna ahcun UDP members hi minung 10,000 renglo an si cang. Kanmah Hakha zong ah Party signboard hi Sang 6 ah kan taar cang. Pyidawtha le Dawrthar lawng taar rih lo a si. Cun, Peng kip in EC nih Palai aa cuh ding mi zong kan hun tawlrel lio a si i June thla dih ahcun kan fiang cang lai. Kan pu bik a si mi U Kyaw Myint @ Zahkung Zung Sau (Za Khung Zung Sawng tiin rel ding) nih a kan kamh bantuk in Ramkomh ning in teinak kan hmuh ahcun chim hau lo tluk a si. Cun, meehmun pakhatkhat asiloah thutdan a lawnnak hmun pakhatkhat ah teinak kan hmuh ahcun, cuka meehmun kanmah UDP party chungtel pohpoh cu sifak harsa deuh an si ahcun taangcheu in taanghra tiang alak tein sianginn kaiter an si lai. Zeidang pawcawmnak le ciinthlaknak zong ah bawmhchanhnak tampi lam a um lai. Pathian nih hi party in harsa mi hna ca ah van in a hun kan thlak mi tluk ah kan ruah. Cucaah, teinak kan hmuh hrimhrim lai, tiah kan chim ngamnak a si,” tiah The Hakha Post ah a chim.
“Hiti kan chim ngamnak cu, kannih party hi Pathian sin ah pekchanhnak tha tein kan tuah. A kan hruaitu kan lu bik a si mi U Kyaw Myint @ Zahkung Zung Sau hi kanmah Chin unau a si mi Kachin miphun a si. Cu Khrihfa a si fawn. A chim peng mi cu sifak santlailo hna zawnruah ding le lothlo in paw aa cawm mi hna bawmhchanh ding a si tik ah Chinmi cu harsa le bawmh hau kan si fawn i party chungtel kan thazaang a thawng lai. Palai kan thim ding mi hna zong zumh awktlak bak mi thim an si lai ca ah thutdan a lawnnak poh ah kan i cuh lai i teinak kan hmuh lai,” tiah Hakha Peng UDP lutlai Pu Ni Hu nih The Hakha Post ah a chim.
Hi UDP party hi 2010 kum U Thein Sein Cozah chan ah Party hmatpungtin No. 16 in dirh mi a rak si nain Chin Ramkulh ah cun nizaan nai lawng in a dir mi party thar pakhat a si.
“Kan pu hi teinak kan hmuh ahcun bia kaa kam mi pawl hi ka tuah lai. Ka tuah lo ahcun taza nan ka cuai lai, a ti ngam mi a si. Hi bantuk bia hi zeibantuk party hmanh nih an chim ngam lo mi bia a si ca ah kan zumh i teinak kan hmuh lai, tiah kan chim ngamnak a si. Amah belte, Union Election Commission (UEC) nih siseh, State Election Commission nih siseh, meepek sawmnak caan an onh rih lo ca ah duhning in kan cawlcang kho rih lo. Cawlcanghnak nawl an kan pek hin cun biatak tein kan cawlcang lai i teinak kan hmuh hrimhrim ko lai,” tiah Palai ca ah taarchung mi pakhat, min langhter lo mi nih The Hakha Post ah a chim.
UDP party cu an lu bik a si mi U Kyaw Myint @ Zahkung Zung Sau nih kan party nih teinak kan hmuh i bawmhnak pek ding ti mi pawl kan pek hna lo ahcun, party tuanvo ngeitu hna nih siseh, pumpak nih siseh, taza nan ka cuai khawh, tiah a chim ngam mi a si. Cu aa kam mi tangka le a herh mi zong ready in aa chiah cang, tiah thawng kan theih
