UK Cozah nih COVID-19 thlop nakding sii-ai a kawltu le a serchuahtu hna siibawite ca ah tangka nuai pound 84 kan bawmh hna lai, tiah Chawhrawlnak Minister Alok Sharma nih May 17 ah a chim.
UK Cozah Chawhrawlnak Minister Alok Sharma (Secretary of State for Business, Energy and Industrial Strategy) nih, “Hi bawmhnak tangka hi sii-ai tampi an serchuah khawh nakhnga le a bik in Oxford University in thiamsang Scientists hna riantuannak ah a thahnem lai. Oxford University le Sii Company a si mi Astra Zeneca hna nih sii-tlang nuai 30 cu September thla chung ah chuah i UK rammi sin ah phawtzamh ding le cun, thaalcaan a dih hlan deuh ah sii sernak sehzung pakhat zong rianrang tein kan tuah lai,” tiah a chim.
UK ram ah hin May 18 chun tiang ah COVID-19 in a zaw mi minung 243,695 an si i minung 34,636 an thi cang
Ref/ DVB
