COVID-19 in kan i ralrinnak le kan i runvennak ah ram dang khua sa Chin mi siseh, ramleng mi si hna seh Laitlang an rak luh tik ah cozah nih phung kan ser ning in an zulh lo a si ahcun Lahwakah Upadi ning in dan kan tat hna lai tiah Lahwakah Zung Lutlai U Mg Mg Lwin sin in kan theih.
Hi kong he pehtlai in Lahwakah Lutlai U Mg Mg Lwin nih, “COVID-19 zawtnak rungrul a ngei mi hi kanmah kan ram chung ah minung pathum an si cang. Hi minung pathum chung ah Chinram chung in Tedim peng, Kaptel khuami pa aa tel ve ca ah Chinram hi kan i ralrin ngaingai a herh. Zawtnak rungrul a ngei mi pa he vanlawng aa cit mi siseh, a um kalnak i minung si hna seh zohfelnak le check nak zong an tuah lai tiah kan theih. Kan i ralrin khawh nakhnga Hakha khua luh lai hauka Gate in zohfelnak le check nak zong kan ngei. Cun, kan i ralrin a herh bik mi cu ram leng lei in a rak tlung mi hna hi an si,” tiah The Hakha Post ah a chim.
COVID-19 kan i ralrinnak le kan i runven nak kong ah Hakha peng tawlreltu Committee le Media hna tonnak 2020 March 25 ah an tuah i hi committee nih zapi sin ah theihternak cathanh zong an tuah.
Cun, “Ram leng khuasa Chinmi siseh, ram leng mi si hna seh Hakha khua chung an rak lut i an rak tlawn a si ahcun kanmah Lahwaka ah siseh, sii-inn lei ah siseh thawng kan thanh hram uh. An rak phak in ni 14 chung kan i runvennak ca ah leng chuahter loin an inn ah kan umter hna lai. Atu bantuk in zulh phung kan ser mi an zulh lo, anmah duh salam in an umkal a si cun Lahwakah Upadi le ramleng mi hna zohkhenhnak upadi ning in taza kan cuai hna lai,” tiah U Mg Mg Lwin nih a chim chap.
