2023 kum, Karen National Union (KNU) ukhruai mi hmunram chung ah kahdohnak 4,600 leng a chuak i SAC ralkap 5,000 leng an thi tiah KNU nih nihin ah a thanh.
KNU hmunram chung ah umhmun a khuar mi SAC ralkap hna le Karen miphun ralkap KNLA, KNDO thithruainak tang ah a um mi ralkap phu komh kar ah kahdohnak voi 4,623 a cang tiah theih a si.
Cu kahdohnak pawl ah cun SAC lei in ralbawi le ralkap 5,005 an thi, 3,345 hma an pu. Karen miphun ralkap KNLA le KNDO thithruainak tang ah a um mi rammi ralkap 154 nih ram ca ah an nunnak an pek i 597 hma an pu tiah cathanh ah an langhter.
Kahdohnak ah a lam kip in a sung cuahmah mi SAC ralhraang pawl nih rammi cung ah timh ciammam in, vanlawng le miakpi in kahdohnak le thahnawnnak an tuah chin lengmang. KNU hmunram Kaw Thoo Lei ukhruainak ram chung ah 2021 in 2023 tiang ah umhmun chuah taak in a zaam mi minung 751,669 an si cang tiah KNU nih a thanh.
Photo: KNU
