2021 kum a voi 73nak Chin Miphun Ni cu Chin Ramkulh Cozah nih Hakha ah an tuah lai tiah Chin Ramkulh, Hluttaw Speaker Pu Zo Bawi sin in thawng kan theih.
Hi kong he pehtlai in Pu Zo Bawi nih, “2021 kum a voi 73nak Chin Miphun Ni hi COVID-19 lio a si ca ah kumdang i kan tuah le kan hman bantuk cu a si lai lo. COVID-19 lio a si ko nain tuah lo cun kan um lai lo nain, zei bantuk indah kan tuah lai titu hi cu kan i fiang kho ve rih lo. Cun, Ramkulh Cozah lei nih tuah a timhnak hi cu fianglak in chim cu a har ngai. Atu tiang ahhin cun Hakha ahhin a si te ko lai ti zumhnak kan ngei. Asinain, Falam lei zong nih Surbung Airport honnak tuahpah in kan tuahpiak ko uh ti zong an kan ti ko nain, zeihmanh lehnak a um rih lo,” tiah The Hakha Post ah a chim.
Hakha an tuah nakding zong hi 2021 January 4 i honnak an tuah mi luatnak lungphun hmun ah tuah a si lai tiah theih a si.
Cun, “Kumdang i Hakha ah kan kan tuah tawn ahcun Vum Thu Maung certual ah tuah a rak si. Atu cu certual zong a thar in remh than dih a si ca ah kan tuah ti lai lo. Cun, certual zong a rawk tuk i kan tuah ti lai lo. Hakha i kan tuah mi luatnak lungphung ahhin kan tuah lengmang cang lai. Puai pakhat khat tuah ding a um a si cun, atu luatnak lungphun hmun peng ahhin kan tuah peng cang lai,” tiah Pu Zo Bawi nih a chimchap.
2020 kum a voi 72nak Chin Miphun Ni hi Hakha Pengkomh, Thantlang khuapi ah tuah a si i, rampi ruahnak petu Daw Aung San Suu Kyi zong aa tel i, biachimnak zong a rak ngei. Tutan Chin Miphun Ni ahhin Ramkomh Cozah lei in lutlai cheukhat zong an ra lai i, Surbung Airport le Hmandaw lam honnak zong an tuah chih lai tiah theih a si.
