SAC ralhraang nih Myanmar ram nawlngeihnak a laak thawk 2021 February 1 in 2023 September thla tiang ah SAC ralhraang le a hnuzul hna kut in rammi 4089 nunnak a liam cang tiah Assistance Association for Political Prisoners (AAPP) nih a thanh
AAPP nih fehter ding in aa zuam cuahmah lio mi thah tong cazin 400 hrawng a dang tein a um rih tiah an ti.
SAC nih hramhram in rammi 24,788 a tlaih hna i, cu chung ah minung 19219 cu thong ah hren lio mi an si. Minung 7345 cu sualphawt in biakhiahpiak cang mi an si.
Dohthlennak he pehtlai in SAC nih thi ding in (Thah ding in) bia a khiahpiak i thonginn ah hren lio mi minung 107 an si. Cun anmah um lo in (In absential) thah ding in biakhiahpiak mi 43 tel in minung 119 cu an um lo bu in sualphawtnak biakhiahpiak an si. Cucaah SAC nih thah ding in biakhiahpiak mi minung 150 an si cang. Tlaihkhih hnu ah a luat than cang mi 5569 an si, tiah an tial.
Atu kan langhter mi cazin hi AAPP nih kan phak khawh tawk kan khawmh mi a si i a taktak ah cun hi nakin a tam deuh kho; cazin kan laak chap i kan fehter khawh ahcun kan chap than te lai tiah AAPP report ah an langhter.
Hmanthlak: AAPP
