A caan thumnak tuahkel meeting a voi khatnak cu 2021 February 1 ah an tuah lai i, hi meeting an tuahnak ah Hluttaw Speaker, rampi President thimnak le Cozah thar kai ding kong pawl caihhmai nak an ngei lai tiah theih a si.
A caan thumnak Pyithu Hluttaw, Amyotha Hluttaw tuahkel meeting cu February 1 zinglei suimilaam 10:00 in Nay Pyi Taw ah an tuah lai tiah Pyithu Hluttaw zung nih 2021 January 6 ah a thanh.
“2020 kum thimnak ah Hluttaw Palai aa zuam i teinak a hmu mi poh February 1 ah a caan thumnak tuahkel meeting a voi khatnak kai ding a si. A fawinak in chim ahcun, Pyidaungsu Hluttaw thar cu February 1 in Cozah thar rian kan domh cang lai. February 1 meeting kan kai ahkhin kan dihlak in biakam chiatserhnak kan tuah lai. Biakam chiatserhnak kan ngeih dih hnu ah Hluttaw Speaker kan thim lai. Hluttaw Speaker thimnak ah Amyotha nih Amyotha an thim lai, Pyithu nih Pyithu kan thim ve lai. Hi kan thim dih hnu ah Hluttaw Speaker le Hluttaw speaker changtu nih meeting an kan hruai lai,” tiah NLD in aa zuam i teinak a hmu mi Pyithu Hluttaw Palai Pu Tial Ling nih The Hakha Post ah a chim.
“2021-2025 kum kar Myanmar ram Cozah thar hi 2021 April 1 in thok a si lai. Cun, atu meeting zong hi COVID-19 zawtnak a chuah lio a si ca ah Ngandamnak Zung nih nawl a chuah ning tein tuah a si lai” tiah Pu Tial Ling nih a chimchap.
Caan thumnak tuahkel meeting a voi khatnak a kai hnga ding Hluttaw Palai dihlak sawmnak ca ngah zong ngah lo zong ah meeting ca ah timhlamh awk a herh mi pawl timhlamh ding in 2021 January 23-34 khi a hnu bik Nay Pyi Taw ka phan ti thawngthanh ding in caan pek an si tiah Hluttaw Zung nih a thanh mi chung ah aa tel.
