2020 thimnak ah kaa tel khawh i, teinak ka hmuh ahcun zei bantuk rian an kan pek zong ah, an kan pek mi rian kha tlamtling tein tuan kaa zuam ko lai, tiah atu lio Chin Ramkulh Cozah Sipin le Electric Minister Pu Soe Htet nih a chim.
Minister Pu Soe Htet hi 2018 May thla ah Minister Salai Isaac Khen hmunhma ah rian an pek mi a si i, atu hi Chin Ramkulh Cozah Sipin le Electric Minister rian in kum 2 leng a tuan cang.
“2013 in Amyotha Hluttaw ah Planning and Finance rian in Deputy Director kum 5 ka tuan i, cu ka tuan chung 2018 May 18 ah Chin Ramkulh Minister rian an ka pek. Minister rian an ka peknak a ruang cu, Sipin le Electric Minister Salai Isaac Khen kha a rian in aa din. Cu tik ah Chin Ramkulh Peng 9 chung ah milu a tambik mi le a kau bik hi Paletwa Peng a si. Chin Ramkulh chung ah milu minung 530,000 hrawng kan um i, Peletwa Peng lawng ah minung 110,000 hrawng an um. Cuti a si tik ah Paletwa minung Minister pek siseh tiah cunglei tuanvo ngeitu hna nih an ti i, Minister rian an ka pek. May 15 rian an kan pek i May 29 ah Chin Ramkulh Hluttaw Zung ah biakamnak ka rak tuah. Atu ka tuannak hi kum 2 leng a si ve cang. Hi kum 2 leng rian ka tuannak ah ka rian a si mi Sipin, Electric, Hotel le khualtlawnnak lei Zung a si. Hi rian ka tuannak ah zatuak 100% cu ka tuan kho lo nain ka si khawh tawk in ka tuan khawh ve tiah ka zumh. Atu 2020 thimnak ah kaa tel khawh i, teinak hna ka hmuh ahcun cunglei upa nih zei rian an kan pek poh ah an ka pek mi rian ka si khawh tawk tlamtlinh le tuan khawh kaa zuam lai,” tiah Minister Pu Soe Htet nih The Hakha Post ah a chim.
“Cun, kei hi Peletwa mee hmun in thim ding a si tik ah, Peletwa Peng ca ah siseh, Chin Ramkulh ca ah siseh, Myanmar rampi nih a herh mi rian ah a si khawh chung in ka zuam lai. Cun, tuan ding zong in timhcia ka si ko,” tiah a chimchap.
