A ralai mi 2020 kum thimnak ah The Union Solidarity and Development Party (USDP) party kan thawng lai, teinak tling zong kan hmuh lai ka zumh, tiah Thantlang Peng USDP Chairman Pu Zo Peng nih July 8 ah a chim.
“2020 thimnak ah teinak kan hmuh lai ka tinak a ruang a um. 2015 kum thimnak ah kan bochan i kan zumh mi NLD Cozah a hung kai. Asinain, kum 3 leng an riantuannak zoh tik ah lung a hmui lo ngaingai. Nihin tiang Nationwide Ceasefire Agreement (NCA) tlam a tlin khawh lo bantuk in ramchung ah ral a tho peng i daihnak a um lo. 2008 phunghram zong an remh kho thiamthiam lo. Sipuazi lei zong ah a thangcho lo. A bik in mei man hna a kai. Sifak santlailo ca ah khuasak a har chinchin. A tawinak in chim ahcun a zeilei hmanh ah an tlamtlinh mi a tlawm tuk. Hi an riantuannak vialte kha rammi mizapi nih kan hngalh dih cang ca ah 2020 kum thimnak ahcun USDP nih teinak kan hmuh ko lai,” tiah Pu Zo Peng nih The Hakha Post ah a chim.
“2010 kum thimnak hnu, U Thein Sein Cozah chan le NLD Cozah riantuannak cuaithlai tik ah a zeilei hmanh ah USDP nih rian kan tuan khawh deuh. Rammi le mizapi zong nih cuaithlai zia an thiam tuk cang i 2020 kum thimnak ahcun kanmah party mee an kan pek deuh lai i teinak kan hmuh lai,” tiah Pu Zo Peng nih a chimchap.
2020 thimnak ah USDP in ahodah aa cuh lai, ti mi a fian rih lo bantuk in khuapi khuate ah mee pek sawmnak an thawk rih lo, tiah kan theih.###
