2020 thimnak ah Myanmar ramchung in pumtlinglo minung 80,000 leng mee khawhnak nawl an ngei i, a hlan in mee pek khawh an si, tiah kan theih.
Hi kong he pehtlai in Kalay hrambunh Disability Development Initiative Deputy Director Salai Joshua nih, “Tukum thimnak ahcun pumtlinglo hna hmapungtin ngeih le ngeih lo a biapi ti lo. Kum 18 a tling mi pohpoh mee pek khawh a si. Sang Khuabawi Zung ah theihpinak ca laktu a hau. Hi bantuk tuahnak ah bawmh a herh mi cu kan bawmh ko hna lai. 2020 July 19 ah Union Election Commission he biaruahnak kan ngei i, pumtlinglo hna mee an pek khawhnak kong kan ceih. A ruang cu COVID-19 zawtnak a um lio a si ca ah, pumtlinglo hna nih mee an pe kho sual lai lo tiah kan phan. UEC zong nih pum thum thim ding an kan pek. 2020 kum thimnak cu, pumtlinglo hna mee zung kal hau lo tein a hlan in mee pek khawh a si. A hlan in mee a pe duh lo mi zong, mee pek tik ah, chungkhat hawikom nih zulh in pek khawh a si. Cun, mee zung pawl dot hnih cung ah an tuah mi hi, pumtlinglo hna ca ah tumkainak a herh ngai i, cu zong cu UEC nih dot hnih cung ah tuah lo ding in kan tawlrel lai an ti,” tiah a chim.
Myanmar ramchung ah pumtlinglo hi naui 2 leng an si nain, tukum thimnak ah minung 80,000 leng mee pe khotu an si tiah UEC nih a thanh. Cun, Chin Ramkulh chung ah pumtlinglo mee pe khotu minung 3031 an um i, mee zung 37 an honpiak hna lai, tiah kan theih.
