A ralai mi 2020 thimnak ah Myanmar rampum huap Ramthen le Ramkulh dihlak ah Chin National League for Democracy (CNLD) party an i zuam lai, tiah tuanvo ngeitu sin in July 5 ah kan theih.
“2020 thimnak ah rampum huap in kan i zuam lai. A bik in Chin Ramkulh le Sagaing Ramthen ah biapi in kan i zuam lai. Atu hi timhtuahnak zong kan ngei dih cang nain hmatpungtin an kan pek rih lo tik ah cawlcanghnak a kan laklawhter ngaingai. Kan zumhnak ah July 15 hlan ah hmatpungtin kan hmuh lai. Khi hnu khin mee pek sawmnak rian zong kan thawk cang lai. Ramkulh le Ramthen dihlak ah CNLD signboard taar zong kan i tim,” tiah CNLD Vice Chairman Pu No Than Kap nih The Hakha Post ah a chim.
Teinak kan hmuh lai, kan thawng ko lai, tiin nan i zum maw, tiah kan hal tik ah, “Kan i zum ko. Kan cak fawn ko lai. Zeicatiah, 2010 le 2015 kum thimnak phichuak tete kha mizapi nih kan hmuh i kan hngalh cang mi a si ko. Ram le miphun dawt a herh zia le riantuan a herh zia mizapi nih kan fiang tuk cang i kanmah party ah mee an pek lai kan zumh,” tiah a chimchap.
CNLD in Hluttaw Palai aa cuh ding mi hna hi nihin tiang ah minung 30 hrawng an si cang. Mahle Peng cio in mizapi nih duh mi kha candidate ah chiah an si lai. Party le minung hi zatuak 50% veve in a biapi mi a si ca ah minung thim i palh sual lo ding zong a biapi tuk, tiah a cunglei upa nih a chimchap.
