Myanmar rampum huap in La-Wa-Ka le Milu Thazaang Minister Zung thar (Ministry of Immigration and Population) an chap mi hi 2020 thimnak ah buainak a tlawm deuh nakhnga chap mi a si, tiah La-Wa-Ka le Milu Thazaang Minister Pu Phuai Ar nih August 7 ah a chim.
NLD Cozah nih an caan donghlei ah Minister Zung thar chap mi hi zeiruang bik ah dah a si, ti kan hal mi he pehtlai in a cunglei bia hi Minister nih a chim mi a si.
“A luancia thimnak lio ah buainak tete a um. Milu tlawmtam zulh in thimnak ah buainak tete a um lengmang mi zong a si khawh chung in buainak a tlawm nakhnga kan i zuam cuahmah. A bik in mee pe khotu nih zalong tein mee an pek khawh nakhnga hi kan i zuam mi a si. Mee pe khotu cazin khawmhsuat hi kanmah La-Wa-Ka, Uknak Zung le Thimnak Zung kan i bawm. Mee vaivuan lo ding in le minung tlawmtam kong ah buainak a chuah nakhnga lo biatak tein kan tawlrel lio a si,” tiah Minister Pu Phuai Ar nih The Hakha Post ah a chim.
“Cun, pumtlinglo si hna seh, sianginn kip siangakchia hmatpungtin tuahpiak tibantuk zong kan tuah cuahmah. La-Wa-Ka lei in ramri hrawng mi luutchuak kan zohfel peng. Tahchunhnak ah Rih Khawdar ramri hrawng hi biapi in kan zohfel peng. Falam le Tedim hrawng i Bengali a luut i tlaih mi hna zong hren peng an si rih,” tiah a cunglei Minister nih a chimchap.
Chin Ramkulh Cozah La-Wa-Ka le Milu Thazaang Minister Pu Phuai Ar cu Kanpetlet meehmun No. 2 in Hluttaw Palai a si. Chin Ramkulh Hluttaw nih June 28 ah Minister ding ah an chuahpi i July 1 ah an fehter mi a si.
