2020 kum party tling democracy thimnak cu a ra lai ding November 8 ah tuah ding a si i, Chin Ramkulh chung mee a pe kho cazin pathumnak ah a dir ve mi Hakha mizapi hna an lung a cawlnak, zeibantuk Hluttaw Palai dah an thim lai i, zeibantuk Hluttaw Palai dah an duh?
Zeibantuk Cozah dah an duh, zeibantuk Cozah dah an i ruahchan i thim an timh. Chin Ramkulh ca ah zeidah kan tuahpiak seh ti an duh mi pumpak an hmuh ning le an i ruahchan mi a tanglei ah kan vun langhter.
Dr. Salai Tluang Za Thang (Hakha GTI Principal)
Keimah ka ruah ning ahcun atu kan Cozah hi ka zoh tik ah a sawhsawh hi a tam deuh. A fawinak in lam a um ah a zaa, inn a um ah a zaa ko ti deuh lawngte an si. Zeithil poh hi a phung men in an tuah dih. 2020 kum tu ahhin cun zeithil poh Quality in an kan kalpi kho tu, an kan tuahpiak khotu le kan nunphung siseh, kan caholh zong siseh a kan kilhkamh khotu ding Cozah hi ka duh bikmi le kaa ruahchan bikmi a si ko.
Mai Thin Yuh Mon (Program Director, Indigenous Peoples Development Program, CHRO)
Atu Cozah a rak kai dingmi sin in kaa ruahchan mi le ka duh bik mi, pakhatnak ah dinfelnak a tanh mi si hna seh ti ka duh. A pahnihnak ah thanchonak hi a si. Thanchonak kan ti tik ah lam le sul lei lawng si loin fimthiamnak, ngandamnak lei zong hi thazaang kan pekpiak hna sehlaw ti ka duh. Pathumnak ah eihmuarnak hi a si. Eihmuarnak hi a tlau kho ngaingai ding hi cu a si kho mi zong a si lo, asinain atu Chin Ramkulh NLD cozah nakin, a ra lai ding Cozah nih hin a zor khawh chung zorter hna sehlaw ti hi ka duh. Mah leng ah mizapi nih kan herh mi zoh in le thei bu tein rian a tuan khotu Cozah si ding hi ka duh bik mi le kaa ruachan bik mi cu a si ko.
Salai Jacob Thang (Chin Society Network)
2020 kum ahhin cun daihnak kan timi hi a tha deuh chinchin ko lai tihi ka zumh. 2008 phunghram remh ding zong siseh, Hluttaw lei zong siseh a tha hrimhrim lai ti hi ka zumh ko. Cun, eihmuar lei zong hi a zorter khotu Cozah hi kan i ruahchan cio mi a si ko lai dah. Cun, zapi he naihniam deuh in a um kho ding Minister le cozah hi ka duh bik cu an si ko. Cun, thimnak ah mi kan thim tik hna zong ah minung zong zoh, party zong zoh ko hna usih. Atu tan Cozah hi cu a hlannak cun a tha deuh hrimhrim ko lai.
Chin Ramkulh chung ah mee a pe khotu ding cazin a tam bik hi thlanglei Laitlang Paletwa, a pahnihnak ah Tedim le a pathumnak ah Hakha an si tiah kan theih.
