Falam Peng Surbung tlang ah an sak cuahmah mi Chin Ramkulh chung a pakhatnak Surbung Airport cu an lim pah cang ca ah ATR-72 phun vanlong September thla chung ah caan tling tlungkal kho cang ding in tawlrel cuahmah a si tiah Chin Ramkulh Chief Minister Pu Salai Lian Luai sin in theih a si.
Hi kong he pehtlai in Chin Ramkulh Chief Minister Pu Salai Lian Luai nih, “Atu ah vanlong tualrawn ser mi hi ai lim ko cang ti awktlak a si. 2020 March 3 tiang ahkhan 83% an lim cang. 2020 kum September thla hrawng ah caan tling in vanlong a tlawnkal khawh nakhnga timhlamh a si. Vanlong khual an tlawn hlan ah cawnnak le hnasaknak tuah a si lai ca ah atu hi an cawn nakding ca ah timhlamh cuahmah a si,” tiah NLD Cozah nih Chin Ramkulh kum li chung an kan hruainak i a kum 4nak ah an tuah tuanmi pawl mizapi sin chimphuannak an tuahnak hmun ah a chim.
Atu Falam (Surbung) Airport ah tlang sang umnak hmun ah an hman tawnmi le an bunh tawn mi Navigation Facilities timi zong an bunh khawh cang. Falam (Surbung) Airport hi kum 2020-21 tangka kum ah lim dih ding in timhlamh a s ii, June thla chung ah honnak an tuah lai tiah kan theih.
Falam Surbung Airport ca ah 2019-2020 tangka kum Myanmar ramkomh Kuatphurhnak Minister Zung nih ramleng bawmhnak le ramleng lei ah tangka cawimi 141.112 billion a hal tiah thawng kan theih.
Cun, Falam (Surbung) sakmi kong he pehtlai in Myanmar ram chung khualtlawng phur vanlong lei rianngei upa U Kyaw Soe Moe nih, “Falam (Surbung) Airport hi kum 2016 April thla in sak hram domh a si. Sak ai lim a si ahcun Chin Ramkulh chung pehtlaihnak le chawlehthalnak zong ah tampi a bawmh khawh hna lai tiah ruahchannak kan ngei. 2020-2021 tangka kum in a sak zong limter a si lai. Atu ah an lim cang ti awktluk a si ko cang ca ah ATR-72 phun vanlong tum kho ding in a herhmi pawl timhlamh cuahmah a si,” tiah Eleven Media ah a chim.
Chin Ramkulh hi fur a tlak poh ah pehtlaihnak lamsul lei harnak kan ton tawn ca ah atu bantuk in Airport a si khawh chung in kan tawlrelnak a si tiah Chief Minister Pu Salai Lian Luai nih a chimchap.
Photo/ Internet
