2020 kum Myanmar ram party tling democracy thimnak ah tlangcung party hna teinak hmuh ning 2015 kum nakin teinak tam deuh a hmumi Ramkulh an um bantuk in a zormi Ramkulh zong an um ve tiah theih a si.
Mon, Rakhine le Kayah hrambunh party pawl cu 2015 kum thim lionak in 2020 kum thimnak ah teinak an hmuh deuh nain, Chin le Karen Ramkulh hna ahcun ruah ning leeng in thimnak a phi a chuak lo tiah Ramkheel lei ngaithlai tu hna nih an chim.
NLD nih Kayah le Mon Ramkulh chung ah 2015 kum thimnak bantuk in 2020 kum ah teinak an hmuh lonak a ruang bik cu Bogyoke Aung San zuklem saknak, hlei pakhat cu Bogyoke Aung San min an bunh mi ruang zong ah a si kho tiah ramkheel ngaithlaitu hna nih an chim.
Shan Ramkulh Hluttaw Palai hlun U Ye Htun nih, “Hlankan in kan rak tuakcia ning ah Kayah ahhin Bogykoe Aung San milem sak ding kong ah miphun tam deuh nih an i lungsak lo. Cu a si ca ah Kayah ram chung ahhin hmun tlawmpal lawng NLD nih a ngah. Cun, Mon ram chung zong ah Kayah bantuk thiamthaim hi a si. Mon ram ah Hlei pakhat min cu hramhram in Bogyoke Aung San min an bunh. Cun, Mon party pawl an i fonh khawh ruang zong ah NLD a thawn lonak hi a si bik ko,” tiah 2020 November 10 i video conference tuahnak ah a chim.
Karen le Chin tlangcung hmun cheukhat ah NLD nih teinak a hmuh mi hi cu, party hna nih mizapi nih kan cohlaan ding in bia an chim kho lo. Cun, miphun thleidannak ngei loin mee an thlak hna zong hi a si ko tiah U Ye Htun nih a chimchap.
Chin Ramkulh chung ah CNLD nih an i ruah ning leeng in teinak an hmuh lomi kong he pehtlai in CNLD party in General Secretary chungtel Salai PP nih, “CNLD party lei in kan i ruah ning bantuk in thil a cang lo. Timhlamhnak caan zong a tlawm tuk tik ah tlamtling in kan i timlamh kho lo leeng ah COVID-19 zawtnak ruang ah meepek sawmnak kan vaak kho lo. Cun, Aung San Suu Kyi rian a tuan khawh mi hi mizapi nih an zumh i, amah thawng in teinak an hmuh zong hi a si ko,” tiah The Hakha Post ah a chim.
2020 kum Myanmar ram thimnak ah NLD nih 2015 kum thimnak lio nakin Hluttaw mee hmun tam deuh ah teinak a hmuh ca ah hawi sawm hau loin, fawizaang in Ramkomh Cozah pi a ser khawh tiah theih a si.
