2020 kum Myanmar ram thimnak cu 2020 November thla 8 (zarhpi ni) ah tuah a si lai tiah Union Election Commission nih July 1 ah mizapi sin ah a thanh.
Hluttaw kip party tling Democracy thimnak tuah ding thla li le ni 7 aa duh ah a thanh hi a si.
November 8 i thimnak an tuah ding kong he pehtlai in CNLD Party Lutlai Pu No Than Kap nih, “November zarh khatnak an tuah mi hi cu a tha ko. Asinain pakhat te ka lung a tling bak lomi cu Khrihfami hna Pathian thangthat ni zarhpi ni theng te an i thim hi cu biaknak zei ah an rel lo bantuk a si. Cun, kaa lawmh khunnak cu ral a thawhnak Rakhine ram le Chin ram Paletwa Peng ah thimnak a um kho ding mi hi kaa lawm tuk, thawngtha taktak a si. Zarhpi ni an tuah mi hi cu a si kho deuh bak lo,” tiah The Hakha Post ah a chim.
November 8 ah thimnak tuah ding a si ca ah hi thimnak ah pumpak in aa zuam ding si hna seh, party in aa zuam ding si hna seh Hluttaw MP Palai dihlak July 20 in 2020 August 7 ni a hnu bik chia in min i pek ding tiah Union Election Commission nih cathanh a chuah.
Cun, hi thimnak ah aa tel ding poh nih 2008 phunghram pi ning in mee sawmnak camping pawl zong tuah khawh a si cang lai tiah July 1 i cathanh an chuahmi ah aa tel.
Cun, CNLD party in Chairman a tuan liomi Pu David Ngai Sak nih, “A tak ahcun zalong le tlukruang mi thimnak a si khawh ding ah Commission lei nih a ni caan hi an kan thawnpiak deuh awk a si. December zarh donghnak tiang thinhpiak khawh a si. Kan hnu UEC he i tonnak zong ahkhan a nicaan thawnpiak ding in party tampi nih kan nawl mi a si. Party tampi nih kan halmi an duh lo ca ah a si. Asinain a nicaan an thanh cang ca ah kan i zuam ve lai. Cun, zarhpi ni hrim ah tuah ding tiah an thanh mi hi party dang lungtlin pinak a um lo. NLD anmah lungtlinnak lawng a si ca ah a dik lo ngai mi a si,” tiah The Hakha Post ah a chim.
2020 kum Myanmar ram thimnak ah ral a thawhnak hmun Rakhine ram le Paletwa Peng telh in Myanmar ram chung ah Peng 330 ah tuah a si lai tiah Union Election Commission nih June 29 ahkhan a thanh.
June 29 i a thanh ning ahcun Pyithu Hluttaw MP Palai ca ah hmun Peng 330, Amyotha Hluttaw MP palai mee hmun ca ah hmun 168, Ramthen le Ramkulh Hluttaw MP palai ca ah hmun 644 ah thimnak an tuah lai tiah kan theih.
