2020 kum Myanmar ram Party tling Democracy thimnak ah tlangcung miphun hna dihlak chung ah mee ningcang lo a si kho mi le mee aa thuat mi a um tiah ralkap nih a thanh mi kong ah Chin National League for Democracy nih a herh tuk lo ah ramkheel lei buainak a chuak khomi a si ca ah kan lungre a thei ko tiah cathanh an chuah.
Hi cathanh an chuah mi chung ah, “2020 November 8 i tuah mi party tling democracy thimnak ah NLD nih tlangcimh vawlei cimh in teinak an hmuh. Thimnak phichuak kong he pehtlai in, a zuamcawh tu party lei nih mee kong ah ningcang lo tete a um an ti i, hihi mizapi karlak ah i hmuh thiam lonak le i theithiam lonak tete zong nifatin in theih le hmuh a si,” tiah aa tel.
Cu lawng si loin, Pyidaungsu Myanmar ram pi hi miphun tling in ser le dirhmi ram a si. Pyidaungsu lungput hrambunh in tlangcung miphun hna nih an herh mi lungrualnak, tantinak, i dirhkamhnak le remdaihnak lei ah tuanti caan zong a si tiah cathanh chung ah aa tel.
Cun, atu bantuk in remdaihnak lei ah siseh, a dangdang lei zong ah siseh tuanti caan a si lio ah tlangcung miphun dihlak hna karlak ah mee ningcang lo a si ko tiah thanh mi kong ah, a herh huaha lo ah ramkheel lei buainak a chuak khomi a si. Hihi kanmah party lei zong nih kan lungre a thei bakmi a si fawn.
Cu a si ca ah tlangcung miphun hna karlak i mee ningcang lo a si kho tiah an thanh mi kong ah dikfel tein tuanvo laak kho le tuanvo laa ngam ding ah tawlrelpiak i a dik mi thimnak a si khawh nakhnga atu bantuk in cathanh kan chuah hi a si tiah an tial chih.
CNLD party hi Chin miphun chung in dirh mi party pathum fonh in dirhmi a si i, 2020 kum thimnak ah Chin Ramkulh, Sagaing Ramthen, Magwe Ramthen le Rakhine ram chung ah an i zuam nain, Hakha Peng, Ramkulh Hluttaw mee hmun lawng ah teinak an rak hmuh.
Ralkap lei a dikmi thawngpang thanhnak zung nih mee ningcang lo a si khomi kong he pehtlai in 2021 January 17 ahkhan a voi 21nak an thanh i, hi an thanh mi chung ah Chin Ramkulh peng kua chung ah mee ningcang lo a si kho mi mee 44767 a um tiah theih a si.
