November 8 tuah ding Myanmar ram party tling democracy thimnak ah Zomi Congress Democratic Party in, Tonzang Peng Ramkulh Hluttaw No.2 mee hmun ah aa zuam ding Minister Pu Pau Lun Min Thang nih, tutan thimnak i keimah he biatak tein aa zuamcawh ding hi NLD an si tiah a chim.
Minister Pu Pau Lun Min Thang nih, “2015 kum thim lio le 2020 kum thimnak tuah ding hi aa dang ngai ko. 2015 kum thim lio ahcun biatak tein a kan zuamcawhtu le a kan dotu hi USDP party an rak si. Asinain, 2020 kum thimnak tu ahcun NLD party hi an si. NLD party hi zeitluk in va thawng ko hna hmanh sehlaw, kanmah he aa zuamcawh ding kan si ca ah tihnak le phannak zeihmanh um lo tein kan i zuam a herh ve ko. Teinak zong ka hmu thiamthiam ko lai ti ka zumh,” tiah The Hakha Post ah a chim.
2020 kum Myanmar ram thimnak Tonzang Peng, Ramkulh Hluttaw No.2 mee hmun ah UDP party in Pi Man Lam Nuam, NLD party in Pu Thang Suan Zam, USDP party in Pu Go Deih Piang, ZCD party in Pu Pau Lun Min Thang, UBP party in Pu Pum Do Kam hna an i zuam lai tiah Thimnak Zung nih a langhter.
Cun, ZCD party in Tonzang Peng aa zuam mi hna kong he pehtlai in, “Tonzang Peng ah kanmah ZCD party in Hluttaw mee hmun, hmun 4 ah kan i zuam. 2015 lio ahkhan Tonzang Peng in Hluttaw mee hmun, hmun 3 lawng kan rak ngah. Tukum tu hi cu Ramkulh No.1, 2 ah siseh, Amyotha ah siseh, Pyithu ah siseh a hmun 4 in teinak kan hmuh lai ti kan i zumh ko. 2015 kum lio ahkhan khua khat ah mee khat te lawng kan ngahnak hi a um pah. Hi pawl zong hi tutan ah meepek sawmnak kan kal tik ah anmah lei zong nih zatuak 60% tluk tiang cu a phan hrim ko lai tiah biakamnak zong an kan tuah ko. Chim khawh mi cu a tlawm bik zatuak 50% cu kan ngah hrimhrim ko lai. Atu bantuk in, mizapi zong nih an kan dirpi kan hmuh ca ah teinak kan hmuh hrimhrim lai ti ka chim ngamnak hi a si,” tiah The Hakha Post ah a chim.
2020 kum Myanmar ram thimnak ah, Chin Ramkulh chung in, Independent telh in party 13 an i zuam lai. Hi party 13 chung in Chin Ramkulh, Hluttaw hmun 39 ca ah minung 210 an i cuh lai tiah Chin Ramkulh, Thimnak Zung nih a langhter.
