2020 kum thimnak ah aa zuam mi Hluttaw Candidate minung 5,600 chung in a cheu hi cu a fek mi mee then 8 ah then khat hmanh a ngah lo mi an tam tiah Ramthen le Ramkulh Election Commission Zung nih an thanh mi chung in hmuh khawh a si.
Cu ti a si ca ah thimnak ah a lut mi Myanmar ram huap Hluttaw Candidate minung 5,600 nih tangka an pek mi chung in ks. sing 7,500 fai rampi tangka ah an chiah.
Thimnak ah i zuam ve ding in a lut mi Hluttaw Palai hna nih minung pakhat ah ks. sing 3 cio pek ding a si. Thimnak ah teinak a hmuh lo leeng ah a fek mi mee then 8 chung ah then khat hmanh a hmu lo mi hna i tangka pek mi cu rampi tangka ah laak siseh tiah Thimnak upadi ah hmuh a si.
Shan Ramkulh le Mon Ramkulh telh lo in a taangmi Ramthen le Ramkulh 12 nih thimnak phichuak an langhter mi chung ah a fek mi mee then 8 ah then 1 a ngah lomi Hluttaw Candidate hi an dihlak ah minung 2,500 leeng an si.
A fek mi mee then 8 ah then 1 a ngah lo mi minung 2,500 chung ah UBP party in minung 800 an i tel. UBP party hi tutan thimnak ah Hluttaw Candidate minung 900 an i zuam. Cun, Myanmar ram chung ah Hluttaw Candidate tam cem a palinak ah a dir mi Tah-sa-ngiah party chung in Hluttaw Candidate minung 300 leeng nih mee then 8 ah then khat a ngah lomi an si ve i, USDP party zong in minung 150 leeng an i tel ve. Cun, Chin Ramkulh chung zong ah a fek mi mee then 8 then khat a ngah lomi zong an um ve tiah theih a si.
Chin Ramkulh chung in then 8 ah then 1 a fek mi mee a ngah lomi hna kong he pehtlai in Chin Ramkulh, Election Commission zung Secretary Pu Lin Kyaw nih, “Chin Ramkulh hi Ramkulh Election Commission zung nih tuak loin Pengkom Election Commission nih tuak a si. A fek mi mee then 8 ah then 1 a ngah lomi hi a um cu an um. Asinain fianglak in kan chim kho rih lo,” tiah The Hakha Post ah a chim.
“Chin Ramkulh chung in mee then 8 then khat a ngah lomi hna hi a tam deuh cu Independent in aa zuam mi an si,” tiah Chin State Election Commission zung lutlai Pu Uk Nawl sin in kan theih.
Teinak a hmu mi Hluttaw Candidate si hna seh, mee then 8 ah then khat cung a ngah mi Hluttaw Candidate si hna seh tangka an pek mi hi thla ruk chung ah an hlam than lo a si ahcun, rampi tangka ah cohlan i laak a si lai tiah upadi ah aa tel.
