2020 kum Myanmar ram thimnak ca ah Chin Ramkulh chung mee pek khawhnak nawl a ngei mi mee an pek khawh nakhnga August zarh khatnak, mizapi sin ah mee cazin langhter a si lai tiah Chin Ramkulh Thimnak Zung Lutlai pakhat a si mi Pu Lin Kyaw sin in kan theih.
Chin Ramkulh Thimnak Zung Lutlai Pu Lin Kyaw nih, “Mee cazin hi a tuan bik tu thla dih lei ah le a tlai bik August thla zarh khatnak ah mizapi sin ah kan langhter lai. Mizapi sin ah mee cazin kan langhter tik ah mee peknak nawl a ngei mi hna nih mee tha tein an pek khawh nakhnga party lei he pehtlaihnak tuah in rian kan tuanti lai, kan i bawm lai. Cun, mee cazin kan langhter tik zong ah upadi nih a onh ning tein kan langhter te lai. Peng kip mee zung ah Call Center zong kan tuah lai,” tiah Hakha Peng Election Committee le CSO, Media hna he ton biaruahnak tuah lio ah a chim.
A ra lai ding mi November 8 ah Party tling Democracy thimnak cu tuah a si lai i, mee petu ding mizapi nih tha te le tluang tein mee kan pek khawh cio nakding ca ah mizapi he i bawm in tuan kan herh tiah U Lin Kyaw nih a chim.
Cun, “Call Center kan tuah mi zong hi mee cazin kan langhter tik ah mee pe kho dirhmun a si ko nain a min aa tel lo mi hna nih an kan pehtlaih i tha deuh in kan tawlrelpiak khawh nakhnga ca ah a si. Mizapi hi kanmah le pumpak rian kan tuan buin ram ca ah rian kan tuan ti hi kan i philh awk a si lo. Cu a si ca ah kanmah hi Hluttaw chung zong ah minung a thlah kho mi le upadi a ser kho mi kan si ca ah mee kan pek tik zong ah tha te le fel tein mee kan pek awk a si,” tiah U Lin Kyaw nih a chimchap.
COVID-19 zawtnak in kan i runven khawh nakhnga mee zung zong tam deuh hon khawh ding in timhlamhnak an ngei. Nihin tiang mee zung hon ding timhlamhnak an ngeih mi hi hmun 1094 a si. 2020 kum thimnak Chin Ramkulh chung ah mee pek khawhnak nawl a ngei mi minung 70000 leng an si tiah kan theih.
