2015 kum thimnak nakin 2020 kum thimnak ah Zomi Congress for Democracy (ZCD) party hi kan thawng deuh ngaingai lai, tiah Chin Ramkulh Cozah Social Affairs Minister Pu Pau Lun Min Thang nih September 24 ah a chim.
“Kan party a thawng deuh lai ka tinak cu, 2015 kum thimnak lio ah mee kan hmuh bak lonak khua 4 nih 2015 kum thimnak ah minung siseh, party siseh, kan i palh. Atu cu ZCD ah kan lut dih cang lai an ti. Amah belte, Tedim hrawng belte hi a huap kau ngai i biatak chuah deuh cu kan hau lai. Cun, USDP le party dang hi cu zuamcawh awktlak ngaingai an um lem lo. A biapi cu NLD hi an si ko. Anmah NLD zong nih USDP hi zuamcawh ding ah an ruat hna lo. Kanmah ZCD tu hi biatak tein cuh le kalh an kan timh. Asinain, pakhatnak ah teinak hmuh kaa tim lai. Pahnihnak ah kan party nih teinak hmuh ding hi kaa hmaithlak fawn lai,” tiah Minister Pu Pau Lun Min Thang nih The Hakha Post ah a chim.
Atulio Chin Ramkulh Cozah Social Affairs Minister Pu Pau Lun Min Thang nih, “2015 kum nakcun kan thawng deuh hrimhrim lai. Cun, kei cu hawi bantuk in mee ka pe u, cutin kan tuahpiak hna lai, khakha kan tuahpiak hna lai tibantuk in meepek ka sawm lo. Kum 4 renglo ka riantuan mi tu hi ka meepek sawmnak cu a si ko,” ti zong a chim fawn.
Minister Pu Pau Lun Min Thang nih siseh, amah party ZCD zong siseh, 2015 kum thimnak lio nakin 2020 kum thimnak ah kan thawng deuh lai, tiah atu bantuk in The Hakha Post ah a fianter hi a si.
