November 8 ah tuah ding Myanmar ram pumpi party tling Democracy thimnak ah Yangon Ramthen, Amyotha Hluttaw No.5 hmun ah Chin pa Pu Kawl Lian cu 88 sianghleirun siangngakchia hruaitu Ko Ko Kyi hruaimi People’s Party in aa zuam ve lai tiah thawng kan theih.
Pu Kawl Lian hi, Falam Peng, Ralam khua ah a chuak mi a si i, Yangon University ah Bachelor of Art in sianginn a rak dih hnu, America ram ah sianginn a rak kai i Ph.D Degree a rak ngah. Cun, America ram University zong ah Professor a rak tuan bal tiah kan theih.
Salai Tluangte: Pu Kawl Lian tutan thimnak na luhnak a ruang hi na kan chim kho hnga maw?
Pu Kawl Lian: Tutan thimnak ka luh hi mizapi nih an ka hal cio mi a si. Kei ka luhnak a ruang bik cu a tawinak in 8888 chan lio i policy he aa khat. Cun, keimah policy he zong aa khat. Cun, kan rampi hi ramthar ah ser i, kan rampi hi a dik mi a fel mi Democracy kan co khawh, Federal Pyidawngsu kan ser khawh ding hi ka duh ca ah le kaa zuam ding kaa hmaithlak ca ah a si.
STT: Chin na si ko bu ah miphun dang party le miphun dang umnak hmun ah naa zuam mi hi zeidah saduhthahnak na ngeih mi a si?
KL: Chin miphun hna lak ah i zuam duh loin atu bantuk in midang pi sin ah kaa zuamnak a ruang bik cu, Myanmar ram, Pyidawngsu pi ahhin kanmah leikap in hmainor i i zuam ding kan si ti hi ka ruah. Chinram le Kalay Peng chung lawng khi kanmah hmun a si lo. Hmundang kadang zong ahhin vaa zuam awk hrimhrim kan si ve ko timi lungput ka naih ca ah a si bik ko.
STT: Tutan naa zuamnak Yangon Ramthen, South Okkalapa mee hmun ahhin tah teinak ka hmu ko lai tiah naa zum ko maw?
KL: Atu kei kaa zuam nak ding hi Amyotha Hluttaw mee hmun ah a si lai. Yangon Ramthen chung Yankin, South Okkalapa, Tamwe le Tingangyunkyi Peng pawl ah a si lai. Atu kaa zuamnak ding mee hmun ahhin NLD telh in a dang party tampi zong an i zuam ve. Kei hi teinak hmuh le hmuh lo hi a biapi ah ka chiah mi a si lo. Kan rampi atu nakin a thancho deuh ding hi ka duh mi le kaa timh mi a si ko. Mizapi nih an kan dawt i an ka dirpi ko lai ti cu zumhnak ka ngei.
STT: Atu naa zuamnak hmun ahhin teinak va hmu law mizapi ca ah zeidah tuah ding naa hmaithlak mi a si?
KL: Kei hi khualtlawng chukcho lamli (Hotel and Tourism) lei a tuan mi ka si bantuk in Myanmar ram chung hihi thancho ter deuh dingin kaa zuam lai. Cun, hi pawl hin tangka lut a um nakhnga zong kaa zuam lai. Hi tangka lut in mizapi zong bawmhchanh ka duh bik ko.
STT: Yangon naa zuamnak ding mee hmun i khuasa Chinmi le na miphun hawi kan dihlak sin ah chim na duh mi a um maw?
KL: Yangon i khua a sa mi ka miphun hawi Chinmi tampi nih an ka dirpi. Meepek sawmnak ca ah tiin tangkafang in a ka bawmmi zong minung tampi an um ve. Ka miphun hawi nih nan ka dirpi lo le nan ka tanpi lo a si ahcun keimah pumpak lawng cun ka si khawh lai lo ca ah, thlacamnak in siseh a lamkip in nan ka dirpi naklai sawm kan duh.
Atu Pu Kawl Lian aa zuamnak ahhin a liamcia kum 2010 thimnak lio zong ah Chin nu pakhat a si mi Pi Kan Kham Dim nih NDF party in a rak i zuam balnak a si tiah theih a si
