Myanmar ram Vice President-2 Pu Henry Van Thio nih 2020 kum thimnak i tangka a hman mi cu Hakha Pengkomh Election Commission Zung ah a pek cang tiah thawng kan theih.
Vice President 2 Pu Henry Van Thio hi 2020 kum Myanmar ram thimnak ah Thantlang Peng, Amyotha Hluttaw No.10 ah aa zuam i teinak a hmu. Zuamcawh tu USDP party in Pu Siang Lian Hmung le CNLD in Dr. Van Hmun Lian hna an si.
Tangka a hman mi kong he pehtlai in Hakha Pengkomh Election Commission Zung Lutlai Daw Cho Khaing Oo nih, “Thimnak ah tangka hman mi Commission zung lei ah a rak ap rih lomi zong an um rih. December 10 hi a hnu bik ni a si i, ap rih lomi zong rak apter an si. Thantlang Peng Amyotha Hluttaw No.10 ah aa zuam mi Pu Henry Van Thio hi a hman mi dihlak sing 7,140,850 a si,” tiah The Hakha Post ah a chim.
2020 kum Myanmar ram thimnak ah President Win Myint nih sing 30 fai, rampi ruahnak petu Daw Aung San Su Kyi nih sing 63 an hman tiah kan theih.
Election Commission zung nih thimnak ah aa zuam i teinak a hmu mi Hlutaw Palai hna i an min cu 2020 November 9 in 15 chung ah a thanh i, thimnak ah aa zuam mi Hluttaw Candidate pohpoh nih teinak a hmumi Hluttaw Palai hna i an min an thanh ni in ni 30 chung ah thimnak an hman mi tangka cu pungsan 20 in ap ding tiah UEC nih a thanh.
Photo/ VP-2 Pu Henry Van Thio Thantlang i mee a thlak lio
