Pathian le mizapi thawng in tutan ka khualtlawnnak cu a tluang ngaingai, teinak zong ka hmuh lai i kan party a si mi USDP zong kan thawng chin lengmang ko lai, tiah Thantlang USDP Chairman le USDP in Pyithu Palai aa cuh ding mi Pu Zo Peng nih September 24 ah a chim.
“Kei ka meehmun asiloah ka khualtlawn nakding hi Thantlang Peng khuate khua 90 bak a si. Keimah pumpak nih ka tlawn dih manh lai lo ca ah Agent (ai-awhtu asiloah lamkaltu) kaa chiah hna. Atu hi Zahnak Tlang ka tlawng lio. Khualhring Tlang hi ka tlawng cang. Cun, Vanzang tlang zong ka tlawng than rih lai. Nihin tiang ka khualtlawnnak ah Pathian nih a ka umpi i 2020 kum thimnak ah teinak ka hmuh lai, tiah zumhnak ka ngei,” tiah Pu Zo Peng nih The Hakha Post ah a chim.
Pu Zo Peng nih a chim rih mi cu, “NLD nih an kan hruai i an kalpi ning cu mizapi nih nan hmuh dih mi a si ko. Daw Aung San Suu Kyi nih Japan ram a kal lio 2019 December lio ah 2008 phunghram kan remh ti lai lo, a ti ko kha mu. Eihmuar siseh, kum tlinglo ngakchia tlaihhrem te hna, hotel ah miruak char tibantuk lainawnnak a tam zia zong nan hngalh dih mi a si ko ca ah tutan thimnak hi cu, kanmah USDP kan cak hrimhrim ko lai,” tiah a chimchap.
Pu Zo Peng cu Thantlang Peng in Pyithu Hluttaw Palai aa cuh ding mi a si i amah he aa cuh ding mi hna hi; Pu Van Bawi Lian (CNLD), Pu C. Za Cung (NLD), Pu Van Za Rung (UDP) le Salai Do Khar (Independent) hna he an i cuh lai, tiah kan theih.
