2020 kum Myanmar ram party tling democracy thimnak ah Chin Ramkulh chung in mee a thla mi dihlak zatuak in 78% a si i, a peng in Tonzang peng hi zatuak 88% in a tam cem an si tiah Chin State Election Commission zung in kan theih.
Hi kong he pehtlai in Chin State Commission zung Secretary Pu Lin Kyaw nih, “Zatuak in zoh ahcun 2015 kum lio kha a rak tam deuh. 2020 kum hi Rampi huap in zatuak 70% lawng nih mee kan thlak. Chin Ramkulh huap lawng kan zoh ahcun zatuak 78% mee kan thlak. Hi chung ah a peng in kan zoh than a si ahcun, Tonzang Peng hi zatuak 88% in a tam cem le zatuak 63% in Paletwa hi a tlawm cem a si,” tiah The Hakha Post ah a chim.
2015 kum thimnak lio ah Chin Ramkulh chung in mee a rak thla mi hi zatuak in 79.23% an si. Cun, tutan thimnak ah Pengkip in mee a thla mi hna hi Falam Peng in zatuak 71%, Tonzang Peng in zatuak 88%, Tedim Peng in zatuak 75%, Kanpetlet Peng in zatuak 79%, Paletwa Peng in zatuak 63%, Matupi Peng in zatuak 85%, Mindat Peng in zatuak 80% le Hakha Peng in 79% hna an si tiah kan theih.
