2020 kum thimnak ah kan party Zomi Congress for Democracy (ZCD) EC nih Palai i cuh than ding in an ka thim i a si khawh chung in teinak hmuh ding in kaa zuam lai, amah belte ka tei lo zong ah sungh ding hi ready ka si thiamthiam ko, tiah atulio Social Affairs Minister Pu Pau Lun Min Thang nih June 30 ah a chim.
Thimnak ah Peng EC hmanh nih thim lo mi cheukhat cu lungfak ngai in an um mi hi nang zeitindah na hmuhning a si, ti kan hal mi ah atu bantuk in sungh ding ah ready ka si ko, tiah a chim hi a si.
“Mizapi nih tuan ko rih seh, an ti i mee an ka pek ahcun asiloah an ka fial mi poh kha ka tuan ko lai. Asinain, ramkheel lei ah ka luhka tein ka chim peng mi cu, teinak lawng kan hmu lai lo. Sungh caan zong a um te lai, ti hi a si. Ka sungh zong le a herh ahcun lo ka thlo ko lai. Cun, Palai kaa cuh tik ah Minister theng, Chief Minister theng tibantuk kha ka ngen lo. Kan miphun ca ah zeidah ka chim khawh lai, ka tuan khawh lai, ti saduhthahnak he Palai cuh kaa timh mi a si. Ka chimcia bang, teinak hi zakhat ah zakhat hmuh ding in kaa timhtuah ko. Amah belte, ka sungh zong ah cohlan khawh ding in ready thiamthiam ka si ko,” tiah Pu Pau Lun Min Thang nih The Hakha Post ah a chim.
Atulio Chin Ramkulh Cozah Social Affairs Minister Pu Pau Lun Min Thang hi ZCD party in teinak a hmu i Minister rank in a tuan lio mi a si. 2020 kum thimnak ah Peng ZCD EC nih i cuh than ding in an fial i teinak hmuh ding ah kaa zuam nain mizapi nih an ka duh ti lo ahcun sungh ding ah ready ka si ko, a titu a si.
