2020 kum Myanmar ram party tling democracy thimnak ah, nu in aa zuam mi hi an dihlak minung 890 an si i, hi chung ah nu 219 nih teinak an hmuh tiah Union Election Commission zung nih a thanh.
2015 kum thimnak lio ahkhan nu aa zuam mi Hluttaw Candidates minung 793 an si i, hi chung ah minung 151 nih teinak an rak hmuh i, 2020 kum thimnak ah nu teinak a hmu mi hna hi 68 in an tam deuh tiah theih a si.
Hi kong he pehtlai in Hakha hrambunh Chin Women Organization chungtel Pi Van Thla Cer Hniang nih, “Atu bantuk in teinak a hmu mi hna chung ah nu an tam hi lawmh a um ngaingai. Hluttaw ah nu kong he pehtlai in tampi thathnemnak a chuahpi lai. A liamcia thimnak pawl ahkhan nu ramkheel ah aa pe mi an rak um lonak zong hi hnulei in thazaang petu an rak um lo ca ah a si bik ko. Tutan ahcun nu zong an tam pah ngai ca ah lung a hmui ngai. Ramkheel lei ah thazaang pek le dirpi zia kan thiam ngai cang ti chim khawh a si,” tiah The Hakha Post ah a chim.
2020 kum thimnak phichuak hi 2020 November 9 in 15 tiang UEC nih a thanh i, hi a thanh mi chung ah rampi huap Hluttaw Palai minung 1117 nih teinak an hmuh tiah theih a si.
Tutan thimnak ah Chin Ramkulh chung in nu minung 12 an i zuam i, minung 4 nih teinak an hmuh tiah theih a si. United Democratic Party (UDP) in nu 6 nih i zuam ding in min an pek nain, UEC lei nih party hrawhpiak a si ca ah an i zuam kho lo.
2020 kum party tling democracy thimnak ah ramkheel party 89 an i zuam. Hi party 89 chung ah party 19 chung lawng in teinak an hmu tiah UEC sin in theih a si.
Photo/ Internet
