2020 kum November 8 ah tuah ding mi Myanmar ram party tling democracy thimnak ah NLD party in Candidate ah thim in fehter cang mi hna Chin Ramkulh NLD telh in minung 12 thlennawnnak NLD CEC nih a tuah hna tiah thawng kan theih.
Hi kong he pehtlai in NLD CEC Lutlai Dr. Myo Ngunh nih, “Rampi chung i Ramkomh le Ramthen dihlak ah minung 12 thlennawnnak tuah a si. Dikthlir in cun kan thlen hna nak a ruang hi ka chim lai lo. Aruang cu kan Palai pawl ca ah buainak le thazaang derthawmnak hna a si sual lai ti kan phang. Hi thlennawnnak kan tuah mi zong hi aa pehtlai mi mah le peng cio ah thawng kan thanh cang hna. Kan thlen mi hna hi an thiamnak le an fimnak nih a tlinh hna lo ruang ah a si lo,” tiah The Hakha Post ah Phone in pehtlaihnak kan tuah ah a chim.
National League for Democracy leikap in 2020 kum thimnak ah i zuam ding in July 23 ahkhan Hluttaw Palai minung 1131 hna cu Amyotha Hluttaw, Pyithu Hluttaw, Ramkomh Hluttaw le Affairs Minister ca tiang in thimnak a tuah i mizapi sin zong ah a thanh cang.
Chin Ramkulh chung i thlennawnnak an tuah mi kong he pehtlai in atu lio Chin Ramkulh Hluttaw Speaker Pu Zo Bawi nih, “Thlennawnak an tuah mi chung ah keimah zong hi kaa tel. Cun, kei hi hmun a duh mi a tinco lo ca ah zuam than aa timh lo mi a si an ka ti. Hmun ka tin ti lo ca ah zuam than lo ding in ka um a si bak lo. Keimah lung tein kaa let than mi a si. Cun, party nih hlawhtlinnak hmu seh ti saduh ka thah ca ah a si. Party chung tu ah biatak tein rian ka tuan lai. Cun, atu thlennak an tuah mi zong hi kanmah Ramkulh chung in si loin CEC nih a tuah mi a si” tiah a chim.
Chin Ramkulh NLD chung in fehter a si cang mi Tonzang Peng le Pu Zo Bawi hna cu fehter an si cang hnu ah thlennawnnak an tuah hna. Hakha Peng Pyithu Hluttaw in thlen a si mi Pu Zo Bawi Hmun ah Pu Sony Thang Cung thim a si tiah kan theih.
