Zeidang ruang ah si loin, kan party nih 2020 kum thimnak ah Hluttaw Palai hmun 50, Peng 24 ah aa cuh ding kan si i General Secretary pakhat dirhmun in kan party nih teinak kan hmuh khawh nakhnga tuanvo tampi ka ngeih ca ah thimnak ah kaa cuh lai lo, tiah CNLD GS Salai Ceu Bik Thawng nih June 29 ah a chim.
“Thimnak ah kaa cuh lai lo, ka ti mi hi General Secretary pakhat dirhmun in ka rian a tam ngaingai. Peng 24 ah kan i cuh lai. Hluttaw Palai hmun 50 ah kan i cuh lai. Cun, kan party nih meepek sawmtu asiloah thanghphawhnak (campaign committee) ah Secretary ka si fawn. Thimnak ah kaa cuh ve ahcun kan thazaang a der sual lai, ti ka phang. Cucaah, kei cu kan party nih hmun tampi ah teinak hmu usih ti hi ka duh i hi rian hi keimah rian a si, tiah kaa ruah. Cucaah, thimnak ah kaa cuh lai lo,” tiah Salai Ceu Bik Thawng nih The Hakha Post ah a chim.
Thantlang meehmun ah hmun a ting lo, an in ti mi kong ah tah, tiin kan hal mi cu, “Khakha cu zei ngaipi a buai mi a um lo. Keimah zong Thantlang ah ka va kal ko. Tluangtlam tein kan um ko. Buai awk ngaingai zong ah ka ruat lem lo. A ruang cu kei ka dirhmun cu kanmah party nih teinak kan hmuh khawh nakhnga hi biapi ah ka chiah i cucu ka tuan ko lai. Khatlei belte ah thim lai ah hin cun asiloah Primary Election ti mi Palai aa cuh ding mi candidate lio ah hin cun, zeibantuk ramkheel party cio hmanh kha an buai pah tawn ko. Asinain, kannih cu kan tluang ko,” tiah a chimchap.
Atulio Social Media ah Salai Ceu Bik Thawng cu Thantlang meehmun ah hmun a ting lo, an kian duh lo, Amyotha Palai hmun ah Pu Henry Van Thio a cuh ngam lo, tibantuk in thawngpang a leng mi kong ah, atu bantuk in Salai Ceu Bik Thawng nih, ‘Kan party teinak kan hmuh nakhnga tuanvo tampi ka ngeih ca ah kaa cuh lai lo,” tiin a fianter hi a si.
